نعم اكتب شعر .. والنظم يحلالي وانا ملزوم

اذا حان الاوان اكتب واشفّي غلّ قرطاسي

انا شاعر ؟؟ نعم شاعر لاني شاعرٍ بهموم

وشاعر بالشعور اللي شعرته قد شعر راسي

شعور المبصر اللي في الظهر ابصر ثلاث نجوم

تعجّب من نهارٍ خان شمسه واصبح يماسي

سأل يا هل ترى هالليل ظالم او ترى مظلوم

وجاوبه القمر بالله تكفى خلْني متناسي

سما روحي في عزّ الصيف ياما تلبدت بغيوم

ولا ذاقت طعم قطرة مطر من عقب هوجاسي

وكلما قلت للصاحب غريقٍ ما اعرف العوم

يقول العوم ؟ وشهو العوم ؟ ذكرني انا ناسي

احس ان الكلام اللي اقوله ماهو بمفهوم

اذا اوجدت اخماسي اضيع فحسبة اسداسي

واذا ناظم نظم نظمي ونظمي نظم مب منظوم

احس باحساس حسّاسٍ يحس بحس احساسي

لذا سيّان عندي سلسبيل الماء والزقوم

وسيّان الصباح العذب وليل يعذّب انفاسي

انا حروف الهجا لا ما تهجاها مخافة لوم

انا اهجيها ونتّف ريشها واقول لاباسي

كتبت الشعر والابيات قادتني وانا المحروم

تسكنّي بعريش من الامل يهدم قصر ياسي

واذا ما قلت شفت نجوم قال الشعر لي معلوم

وفجأة تصبح النجوم عزّ الظهر جلاّسي

شعوري بالشعر شايع وانا شاعر شعرت فيوم

بأن الشعر لي صاحب اذا ما يعالج يواسي